حزلئوم في بلطيم

اعتقد ان الشعب المصري (الثوار ) حاليا في وضع مشابه تماما لوضع حزلئوم (احمد مكي - في فيلم لاتراجع ولا استسلام)عندما اعتقد انه هيسافر اليونان علشان يبقي زي احمد زكي في النمر الاسود وركب مع المركبي (المجلس العسكري ) وعندما رمي نفسه في عرض البحر وعام حتي وصل الي الشاطئ وجد انه في بلطيم !! يا تري اي شعورك وهو مفيش اي تغير ولا ديموقراطية ولا حرية تعبير ولا عدالة اجتماعية تحقق منها جزئ او حتي ظهر في الافق انها ستتحقق . بس حزلئوم كان معلم المركب ان عليها لباسيين !

حكم مصر علي طريقة لاتراجع ولا استسلام (االقبضة الدامية )

حكم مصر علي طريقة لاتراجع ولا استسلام (االقبضة الدامية )

أعتقد ان المجلس العسكري يستخدم نفس اسلوب ظابط جهاز الامن السري المصري ومعاونة في فيلم لاتراجع ولا استسلام (االقبضة الدامية ) فهم يستخدمون نفس الافكار البالية اللي اتهرست في 100 فيلم قبل كده ومتاكدين انها هتنجح برده المرة ديه اشمعني هما يعني !!! 1- يستخدم حكام مصر حاليا سياسية فرق تسد و تم بالفعل تقسيم المصريين الي فريقين "منتسبي الاخوان والجماعات الاسلامة " وطالبي الاستقرار مقابل الباحثين عن التغير من ليبراليين ودموقراطيين (ملحدين خونة وعملاء و بياخدوا فلوس من امريكا ) (الغريبة انها نجحت لما عملت استفتاء ) 2- يستخدم المجلس العسكري اسلوب الالهاء باستخدام الكورة و الدوري المصري والاصرار علي استكمال المباريات واشعال المنافسه علي التافهة لالهاء عموم الشعب من اهلوية وزملكوية (الغريبة انها نجحت في شغل الناس ) 3- التخويف من الكارثة الاقتصادية (بسكلته الانتاج مش لقيين ناكل -هنموت من الجوع - قربنا نوصل لدرجة بيتزا ياعمتو ) الناس هتنزل ليه هي البلد ناقصة (وبرده نجحت !!!) 4- الانفلات الامني : استخدام فكرة ان مفيش شرطة و محدش هيحميكم دافع عن نفسك احترس . الشرطة عايزينها تنزل كرامة وكبرياء وهيبه رجال الشرطة وبرده مفيش امن !!! وبرده نجحت 5- الاستقلال القضائي : مؤسسة تختار بناء علي المستوي الاجتماعي واختنياراتها تشوبها كثير من المجاملات وبرده فكرة محدش يتكلم علي احكام القضاء مع ان عادي اننا نتكلم علي احكام الدين لكن احكام القضاء مقدسه !! 6- محاكمات العسكري (قانون الطوارئ ) :- هتسكت ولا في محاكمات عسكرية يا بلطجي بدلا من عميل اوارهابي سابقا !! 7- الفتنة الطائفية :- حرق كنيسة وهدم كنيسة واعتصامات مسيحين عند ماسبيروا وقطع طريق ورفض محافظ (والشعار المسلم والمسيحي ايد واحدة) قديمة اوي الحجات ديه بس برده نجحت !!! 8- الاعلام :- يبدا كلمتة وينهيي بكلمة (نشكر المجلس العسكري انه حمي الثورة !!!) مع وصلات من النفاق تصل الي درجى نطالب المجلس بالاستمرار في الحكم !! وفعلا قدر حزلئوم ذو الذكاء المحدود والقدرات الضعيفةجدا ان يقبض علي العصابة كلها لوحدة (بعد ما انكشف بطريقة ساذجة ) وينقذ امه والمزة وكمان تقع في حبه ويتجوزها ., ويبقي سؤال الشعب " اين اشيائي"

المصطبات الرياضية

ارجو ان ينتهي مسلسل المصاطب الرياضية .
بصراحة الموضوع بايخ جدا جدا .
الفكرة بسسيطة جدا وهي عبارة عن اي لاعب كرة قدم وامامه كاميرا واتصال مباشر ويبدأ الرنامج بالاتي .
1- قراءة الاخبار من الصحف الرياضية ومواقع الرياضة المختلفة . أخبار كرة القدم بس .
2- مناقشة اي قضية "تافهه" وكلام ورغي رغي بنفس ط\رق المصاطب ده قال وده قال وهوقاله ةانا قولتله وانا قولتلكم ورغي وخلاص . القضية اوز المشكلة تخص كر القدم فقط وخصوصا الاهلي والزمالك .
3- متابعة بعض الاحداث الرياضة ولقائات مع اللاعبين تتلخص في الاتي .
a. اللي بيكسب يحمد ربنا ويقول ان نفذوا خطة المدرب وكلهم تعبوا ويستهلوا يكسبوا .
b. اللي اتغلب يشتكي من الحكم وان اللاعبين قصروا ولم يكن الاداء في تقصير وغير كلام المدرب .
ده ملخص كل البرامج الرياضية المصرية . وتكرار تكرار في نفس المواضيع ونفس الكلام .
طيب اللي المطلوب .
تغيير في شكل اسلوب البرامج الرياضية تتلخص في الاتي .
1- نشر الثقافة الرياضية اللعبة – طريقة اللعب - اشهر الاعيبين – اهم المهارات . ... إلخ
2- متابعة البطولات والرياضيين المصريين في البطولات المختلفة .
3- عمل افلام تسجيلية عن اللاعبين المصريين واللعبات الرياضية والابطال المتوقعين احراز بطولات وميدلات في البطولات الاولمبية والعالمية .
4- مناقشة القضايا الرياضية الحقيقة وهي كيفية زيادة عدد الممارسين للعبات الرياضيى المختلفة ، الطرق السهلة والغير مكلفة للمارسة الرياضية ، كيفية الوصول الي البطولات العالمية ،

أعتقد انن جزء من ده هيكون مفيد جدا وربما يعدل شوية من شكل البرامج الرياضية ، ويخليها تفيد بجد الرياضة والرياضيين .

دعوة

دعوة كل المصريين للتوقيع علي بيان التغيير
علشان اولادك واولادي .
علشان الامل لحياة احسن .
حتي لا تلوم نفسك مستقبلا .
الطريق الطويل يبدأ بخطوات بسيطة
غد مصر تستحق ما هو افضل مما نعيشه اليوم .
https://www.taghyeer.net

انا بييب سايق بييب ميكرو بييب باص بيييييييييييييييييب

سواقين الميكروباصات
وادب سواقين الميكروباصات
عايزين نعد العادات السيئة لسواقين الميكورباصات
1- بيدوس علي الكلاس اكتر ما بيدوس علي البنزين
2- بيجرب بسرعه جدا علشان يلحق الدور ويفرمل علشان جنيه واقف علي الارض (زبون او راكب بلغة السواقين اللي اجرتهم جنيه )
3- يتبع طريقة اللي مين الفتوة في السواقة .
4- يرج ويهز الناس اللي راكبين (نفس طريقة رج الادوية قبل الاستخدام )
5- الشتيمة اكتر من الكلام
6- مبيلمش الاججرة وعايز واحد من الركاب يلمهاله (اشتغلوا عنده )
7- بعد ما الاجرة بتجيله بيشرب سيجارة .
8- في بعض المناطق يقسم الطريق الي نصفين او 3 حسب الزباين ما يعرف يصحك عليهم .
9- مفيش فكة (علطول ) .
عايز بيقيت اراءكم ومشاكلكم مع الميكروباصات
وازاي نحلها

الوحدة الوطنية

انا بصراحة عندي ارق من كلمة الوحدة الوطنية ؟
مش لقيلها معني .
يا اما نكون في البلد ديه (مصر ام الدنيا ) عايشن مع بعض من غير تفريق او تميز . فكده ملهاش معني علشان احنا عايشين مه بعض .
او اننا عايشين مفرقين علي اساس الدين (مسلم ومسيحي ) او ( صعيدي وفلاح و بدوي وقاهري ونوبي ) وكل فرقة بتطالب بحقوق خاصة بيها لوحدها . فكده احنا اكتر من فئة ومينفعش نكون واحد .
يا ريت الاخوة الموجدين يشرحوها علشان كلنا نستفيد .
ويا ريت نحدد بعد كده هل استخدام الكلمة ديه ليها معني ام اننا ليس في حاجة لاستخدام كلمة الوحدة الوطنية .

DJ

يا ريت موضوع ال D.J (لعنه الله علي تملك الجهلاء للتكنولوجيا )
بقي اي واحد عنده فرح - حنه - تنجيد - ي فرش عروسه - افتتاح دكان - عيد ميلاد - سبوع - طهور اي حاجة (يعمل D.J) في الشارع لغاية الساعة 12 بليل وهاتك يا قرف ودوشة في كل الناس المحيطين بيه .ويولع الشارع علي الناس اللي عايشين فيه (يلا خليهم يفرحوا وباقي الناس تولع ). وهما 50 جنيه تمن تاجير ال D.J وهتقرف الناس طول اليوم .
غير اساس ان عدد الحاضرين في اي يتعدوا علي الصوابع . بس قرف في المنطقة وخلاص
كان زمان في الافراح شوية ستات وبنات يقعدوا يغنوا لغاية ما صوتهم يتنبح (واخر صوتهم ان الاوضة اللي جنبهم تسمع كده طشاش) علشان في اي وضع مفيش اختراع اسمه امبليفير ولا سماعات كام الاف واط تقدر تضيع حسه السمع عند الناس . بس ايه فايدة حسه السمع ومفيش احساس اساس .
يا ريت يا جماعه نبطل شوية نضايق بعض ونخنق بعض بالصوت العالي زيادة عن اللزوم .
انا اتخنقت من ال D.J